Պնդումներ՝ նախկին գլխավոր դատախազ Գևորգ Կոստանյանի շրջապատի նկատմամբ ճնշումների մասին

Երեւան, 29 դեկտեմբերի, 2021թ Հանրապետությունում շարունակվում են քննարկումները նախկին պաշտոնյաների և նրանց շրջապատի նկատմամբ իրավապահ մարմինների գործողությունների վերաբերյալ։ Նախկին գլխավոր դատախազ Գևորգ Կոստանյանի մտերիմները մտահոգություն են հայտնում, որ իրավապահները ճնշումների և քրեական հետապնդման սպառնալիքների միջոցով փորձում են ցուցմունքներ կորզել նրա շրջապատի անդամներից։ Նախկին վարորդ և Գևորգ Կոստանյանի երկարամյա վստահելի օգնական Դավիթ Օրդուխանյանը մեզ հետ զրույցում ասաց, որ վերջին ամիսներին ինքը բազմիցս է կանչվել հարցաքննության՝ նախկին գլխավոր դատախազի դեմ հարուցված քրեական գործերով։ Ըստ նրա՝ իրավապահները հետաքրքրվել են Կոստանյանի անձնական և գործնական կապերով, հանդիպումներով և ենթադրյալ ֆինանսական փոխանցումներով։ Օրդուխանյանի խոսքով, քննիչները հարցաքննությունների ժամանակ պահանջել են ստորագրել նախապես պատրաստված ցուցմունքներ, որոնց բովանդակությունը, ըստ նրա, չի համապատասխանում իրականությանը և նպատակ ունի հիմնավորել Գեւորգ Կոստանյանին առաջադրված մեղադրանքը։ «Ինձ ասացին, որ եթե համագործակցեմ, ստորագրեմ, խնդիր չեմ ունենա, բայց եթե հրաժարվեմ, կարող են քրեական պատասխանատվության ենթարկվել»,- ասում է Օրդուխանյանը։ Նրա խոսքով, որպես Կոստանյանի նախկին վարորդ և ընտանիքի վստահված անձ, ինքը եղել է իրավապահ մարմինների հատուկ ուշադրության կենտրոնում։ Օրդուխանյանը պնդում է, որ նախկին գլխավոր դատախազի դեմ ցուցմունք տալու համար իր նկատմամբ կիրառվել է և՛ հոգեբանական ճնշում, և՛ սպառնալիքներ։ Իրավապաշտպան շրջանակներում մտահոգություններ կան, որ նախկին իշխանության ներկայացուցիչների կամ նրանց հետ կապեր ունեցած մարդկանց դեմ հետաքննությունները հաճախ ուղեկցվում են ճնշումներով, բռնությամբ, ոտնձգություններով և սպառնալիքներով։ Մինչդեռ իրավապահ մարմինները շարունակում են պնդել, որ բոլոր գործողություններն իրականացվում են բացառապես օրենքի շրջանակներում։ Գևորգ Կոստանյանի գործով քննությունը շարունակում է մնալ հանրության ուշադրության կենտրոնում, և նրա նախկին շրջապատի հայտարարությունները նոր հարցեր են առաջացնում՝ կապված քննության մեթոդների և իրավապահ մարմինների գործունեության հետ։ Լիլիթ Թումանյան