Այսօր Ազատության հրապարակում տեղի ունեցավ բողոքի ցույց՝ Հայաստանի՝ ՀԱՊԿ-ից դուրս գալու պահանջով։ Հայաստանի Եվրոպական կուսակցության անդամները երթը սկսեցին Օպերայից և Պռոշյան փողոցով շարժվեցին դեպի վարչապետ Նիկոլ Փաշինյանի նստավայր, որտեղից նա պետք է մեկներ ՌԴ նախագահի հետ հանդիպման։ «Պուտինը Հայաստանից դուրս», «Այստեղ ահաբեկիչների համար տեղ չկա» պաստառներով, ինչպես նաև Ուկրաինայի, Եվրամիության և Միացյալ Նահանգների դրոշներով ցուցարարները հավաքվել էին բողոքելու Երևանում մեկնարկած ՀԱՊԿ գագաթնաժողովի դեմ։ Գագաթնաժողովին մասնակցելու համար այսօր Երևան են ժամանել նաև Բելառուսի, Ղազախստանի, Ղրղզստանի և Տաջիկստանի նախագահները։ «90-ականներից սկսած՝ մեր անվտանգության երաշխիքների դիմաց մենք Ռուսաստանին տվեցինք այն ամենը, ինչ կարող էինք՝ էներգետիկ ենթակառուցվածքներ, երկաթուղիներ, մենաշնորհներ, մտանք ԵԱՏՄ, ինչը մեզ տնտեսապես բոլորովին ձեռնտու չէր»,- ասաց հանրահավաքի մասնակից, Հայաստանի Եվրոպական կուսակցության անդամ Սիփան Զարգարյանը, ով ներկայացնում էր կուսակցության երիտասարդական թևը։ «2020 թվականի սեպտեմբերին, ցավոք, եկավ այն օրը, երբ մենք իրական կարիք ունեինք ստանալու անվտանգության երաշխիքներ, որոնց համար վճարեց ողջ ժողովուրդը, բայց անվտանգության փոխարեն մենք դավաճանություն ստացանք, Ռուսաստանը փաստացի քաղաքական աջակցություն ցուցաբերեց Ադրբեջանին»,- բեմից ասաց Հայաստանի Եվրոպական կուսակցության հիմնադիր Տիգրան Խզմալյանը։ Հիշեցնենք, որ Հավաքական անվտանգության պայմանագրի 4-րդ հոդվածի համաձայն՝ ցանկացած անդամ երկրի դեմ ագրեսիան համարվում է ագրեսիա ՀԱՊԿ բոլոր երկրների դեմ։ Սակայն ՀԱՊԿ-ի կողմից Հայաստանին ռազմական օգնություն չի ցուցաբերվել։ Ակցիային միացել են նաև տասնյակ ռուսներ, ովքեր պատերազմի սկզբից տեղափոխվել և ժամանակավորապես բնակվել են Հայաստանում։ Նրանցից մեկը՝ 27-ամյա Դմիտրին, ասաց, որ հիացած է Հայաստանում որոշ ընդդիմադիր կուսակցությունների, այդ թվում՝ Եվրոպական կուսակցության գործունեությամբ, նրանց գաղափարախոսությամբ և համարձակությամբ, թե ինչպես են նրանք հետևողականորեն պայքարում ավտորիտար ռեժիմների դեմ՝ Ռուսաստանում և Հայաստանում։ Ավելի ուշ հայտնի դարձավ, որ ոստիկանները Երեւանի Պարոնյան փողոցից 4 հոգու բերման են ենթարկել բաժին, այդ թվում՝ Հայաստանի Եվրոպական կուսակցության նախագահ Տիգրան Խզմալյանին։ Ոստիկանության լրատվական ծառայությունից դեռ չեն մեկնաբանել, թե ինչու են բերման ենթարկվել ակցիայի կազմակերպիչները։ Ոստիկանության բաժնից հրաժարվեցին որևէ տեղեկություն տրամադրել նաև Տիգրան Խզմալյանի փաստաբանին։ Այս մասին հայտնել է կուսակցության անդամ Սիփան Զարգարյանը։

«Հայաստանի դաշինքը նախաձեռնել է ստորագրահավաք՝ Հայաստանում վերջին իրադարձությունների մասին տեղեկատվությունը միջազգային ասպարեզ հասցնելու նպատակով։ Կուսակցությունը, մասնավորապես, մտահոգված է իր անդամների, ինչպես նաև այլ ընդդիմադիր ուժերի ներկայացուցիչների զանգվածային և անհիմն կալանավորումներով, քաղաքական հետապնդումների և բացահայտ ճնշումներով։ Դաշինքի անունից կուսակցության խորհրդի անդամ Հակոբ Նիկողոսյանը համախոհների հետ մի քանի օր է ստորագրահավաք է իրականացնում Երևանի իր առևտրի սրահում, որն անցկացվում է «Ընդդեմ իրավապահ մարմինների բռնությունների» կարգախոսով։ Նախաձեռնության հեղինակը կոչ արեց իր պաշտպանյալներին, ինչպես նաև մյուս քաղաքացիներին միանալ ստորագրահավաքին և լսելի դարձնել հասարակության ձայնը։ «Եթե մենք հիմա չկանխենք այս ամենը, հետագայում դա այլևս հնարավոր չի լինի։ Իշխանությունների լկտի պահվածքը և իրավապահ ու անվտանգության մարմինների ապօրինի գործողությունները երկրում ստեղծել են ամենաթողության և անպատժելիության մթնոլորտ, որն աշխատում է բոլորիս դեմ»,- նշում է Հակոբ Նիկողոսյանը։ Ստորագրահավաքով նրանք մտադիր են միանալ ԱԺ մարդու իրավունքների պաշտպանության հանձնաժողովի նախագահ Թագույա Թովմասյանի նախաձեռնությանը, որի շրջանակներում պատգամավորը մտադիր է բարձրացնել ԵԽ-ում զանգվածային բռնությունների հարցը։ «Ստորագրահավաքը մեր ձայնն է՝ հանուն արդարության և մեր անվտանգության»,- ընդգծում է Նիկողոսյանը։ Ստորագրահավաքը կտեւի մոտ մեկ ամիս, որից հետո դրանք կփոխանցվեն ԱԺ պատգամավոր Թագուհի Թովմասյանին, որպեսզի խորհրդարանական հանձնաժողովի նախագահը հավաքված բոլոր ստորագրությունները ուղարկի Եվրախորհուրդ։ «Ոչ ոք չի կարող կանգնեցնել մարդկանց, ովքեր պայքարում են իրենց իրավունքների համար»,- եզրափակում է Հակոբ Նիկողոսյանը։